БИШКЕК, 30-янв. — Sputnik. Бишкек ТЭЦиндеги №3 блок таңкы саат 4:40та ишке киргенин "Улуттук энергохолдинг компаниясы" ААКтын маалымат кызматы билдирди.
Ага ылайык, жаңы блок 150 МВт энергияны иштеп чыгып, +88 градуска чейин жылуулук берет. Системадан чыккан суунун жылуулугу 66-67 градуска чейин жетет.
29-январда системага суу толтуруу аракеттери башталган.
"Системага жылуулук берилип, учурда температура 10 градуска чейин көтөрүлдү. Тийиштүү температураны кармап туруу үчүн суу бир нече жолу айлануусу керек, ал үчүн 3-4 саат зарыл. Кечке чейин шаардыктардын үйүндөгү жылуулук калыбына келет", — деп айтылат маалыматта.
Эски буу казандардагы оңдоо иштери азыркыга чейин тынымсыз жүрүп жатканы "Улуттук энергохолдинг компаниясы" тараткан билдирүүдө айтылат.
Ал арада Башкы прокуратура ТЭЦтеги авария боюнча кылмыш ишин козгоду.
