Кыштын ызгаарында мындайды күтпөгөн шаар тургундары анын ичинде көп кабаттуу үйдө жашагандар өкмөткө, мэрияга нааразы болуп социалдык тармакка түрдүү пикирлерин жарыялашты.
Алгач калаа мэри Албек Ибраимов Facebook баракчасы аркылуу шаардыктарга кайрылуу жасап, жылуулук электр борборунда утурумдук өндүрүштүк көйгөй келип чыкканын айтып кырдаал 4-5 сааттын ичинде жөнгө салынаарын кошумчалаган.
Бирок абал жөнгө салынбагандыктан, калаа тургундары социалдык тармактарга үшүп жатышканын жаза башташты.
Шайырбек Абдрахманов аттуу колдонуучу болсо "суукка даярбыз деген убадалар кайда" деп суроо салган.
Үйлөрүн термометр менен ченегендер да четтен чыкты.
Дайырбек Орунбеков аттуу колдонуучу мэрге тийишип "Албек мырза, үшүп кеттик оор болбосо ТЭЦке отундан үч-төрттү таштаттырып коесузбу" деген.
"Окорачка" болуп калбасак болду" деген Назира Айтбекова да үйү жылыбай жатканын айтып нааразы болду.
Айрымдары "мындай суукка даяр болбогондон кийин тийиштүү мекеме жетекчилери кызматын таштап эле кетип калса болмок" деп жандары кашайган.
