БИШКЕК, 12-окт. — Sputnik. Премьер-министр Сапар Исаков Ысык-Көл облусуна болгон иш сапарынын алкагында Балыкчы шаарындагы аймактык оорукананын алдындагы гемодиализ борборунун иши менен таанышты. Бул тууралуу өкмөттүн маалымат кызматы билдирди.
Эскерте кетсек, жеке ишкер Мирлан Исагалиевдин каражатына курулган борбор март айында ачылып, 1-июндар тарта бейтаптарды бюджеттик негизде кабыл ала баштаган.
Исаков меценатка ыраазычылык билдирип, мындай кадам көпчүлүк үчүн үлгү болушу керектигин белгиледи.
"Өлкөдө медицина жаатында мыкты адистер көп, аларга тиешелүү шарт түзүп берүү зарыл. Бул борбор медицина персоналыны иштөөгө, ал эми оорулуу мекендештерибизге дарыланууга мыкты шарт түздү", — деди өкмөт башчы.
Сапарынын алкагында премьер-министр Саламаттык сактоо министрлигине аталган борбордун толук кандуу иштеши үчүн аны өз убагында тиешелүү каражаттар менен камсыздап турууну тапшырды.
Белгилей кетсек, жеке ишкер Исагалиев августтун башында Таластын облустук ооруканасына Тез жардам автомашинасын атайын Германиядан алдырып белекке берген.
