БИШКЕК, 16-ноя. — Sputnik. Ысык-Көлдө адам өлтүрүү фактысынын бети ачылгандыгын облустук ички иштер бөлүмүнүн маалымат кызматынан билдиришти.
Кашат айылынын 26 жаштагы тургунунун сөөгү 19-октябрь күнү табылган. Окуя болгон жерге барган ыкчам-тергөө тобу анын баш сөөгүндө көптөгөн канталаган тактар бар экендигин аныкташкан. Бул факты боюнча Кылмыш жаза кодексинин 97-беренеси (Адам өлтүрүү) менен кылмыш иши козголгон.
"Кылмыш боюнча суралган күбөлөрдүн айтмында, 17-октябрь күнү болжол менен саат 22.30 чамасында 26 жаштагы тургун мас абалында айылдаш келинден үйдүн эшигин ачып, жыныстык катнашка баруусун талап кылган. Үйүндө балдары менен гана отурган келин ошол учурда Бостери айылында иштеп жүргөн күйөөсүнө телефон чалып, тез арада келүүсүн суранат", — деп айтылат билдирүүдө.
Кошуна келиндин тынчын алып жаткан мас адамды Асанбек жана Нурбек аттуу адамдар токтотууга аракет кылышат. Ал аңгыча күйөөсү дагы келип калат.
Маалыматка караганда, милиция кызматкерлери кылмышка шектүү адамдарды бир айдан кийин колго түшүрдү. Алар ушул эле айылдын 40 жана 31 жаштагы тургундары болуп чыккан. Экөө тең күнөөсүн мойнуна алганы белгилүү болду.
Учурда шектүүлөр убактылуу кармоо жайына киргизилип, тергөө иштери уланууда.
