Нарын шаары 155 жашка чыкты. Архивдик жана азыркы сүрөттөр

Нарын тоолордун арасында, деңиз деңгээлинен 2 040 метр бийиктикте жайгашкан. Чок ортосунан Нарын дарыясы өтөт. Жарым кылымга жакын мурда тартылган сүрөт.

Борбордук аянттагы жергиликтүү администрация — облустук комитеттин имараты. Бул азыр да шаардын көзгө басар курулуштарынын бири. Албетте, азыр айланасы бир топ өзгөргөн.

Советтик доордогу Кыргызстандын 40 жылдыгы атындагы эс алуу паркындагы Владимир Ильич Лениндин эстелиги. Баса, мындай эстеликтерди Кыргызстандын бир канча жерлеринен кездештирүүгө болот.

Нарын облусунун борбордук көчөсүнүн бир кездеги көрүнүшү. "Жигули" менен эл арасында "сары автобус" атка конгон ПАЗ. Азыр бул жолдон кыймыл үзүлбөйт.

Бузулуп калган шаардык автоунаа СССРдин башка калааларындай эле ушундай автостанцияда оңдолчу

Муратбек Рыскулов атындагы Нарын облустук музыкалык драма театры калктын маданий турмушуна өзүнүн ири салымын кошкон

Театрдын репертуары, актерлордун оюну, жадагалса декорациялар да элге укмуштай таасир этер эле. Сүрөттө Жусуп Турусбековдун "Ажал ордуна" тарыхый-революциялык драмасынын негизинде режиссер Бообек Ибраевдин постановкасынан алынган ирмем. Сахнада республиканын эл артисттери.

Азыркы Нарын педагогикалык колледжи мурда 1939-жылы ачылган Гоголь атындагы мугалимдер институту болчу

Нарын Тянь-Шандын тоолоруна саякат жасайм дегендер үчүн алгачкы баскыч эле. Андыктан ушундай мейманкана үйлөрү курулган. Бул тоолуу шаардан азыр да туристтердин аягы үзүлбөйт.

Шаардын ал кездеги эң белгилүү "Ала-Тоо" рестораны...

"Соң-Көл" кинотеатрынын имараты. 2014-жылы ага КРдин эмгек сиңирген артисти Таттыбүбү Турсунбаеванын ысымы берилген.

Калаадагы белгилүү универмагдардын бири. Баса, 60-жылдарда кире бериш жеринде "Соода кызматкерлери, калкты тейлегиле!" деген жазуу илинип турчу.

Бул сүрөттө Нарындын Москва көчөсүндө жаңы курулуп бүткөн көп батирлүү үйлөр чагылдырылган

60-жылдардагы борбордук телеграф...

Туптуура 55 жыл мурда тартылган сүрөт. Анда Нарын калаасы 100 жылдык юбилейин белгилеген.

Көрүнүктүү мамлекеттик ишмер Турдакун Усубалиев атындагы аянт. Кыргызстанды чейрек кылымга жакын башкарып турган бул жетекчиге айкел 2019-жылы ноябрда тургузулган.

Нарын облустук мамлекеттик администрациянын имараты

Теңир-Тоонун борбору Нарын шаары жана Нарын дарыясынын асмандан тартылган сүрөтү. Учурда калаада 42 миңге чукул киши жашайт. Жалпы аянты — 5 040 гектар.