БИШКЕК, 23-фев. — Sputnik. Быйыл Түркияда өтө турган Көчмөндөрдүн дүйнөлүк IV оюндарында көк бөрү тай казаны жок ойнолмой болду. Мындай чечим кечээ, 22-февралда, Түркияда болгон Этно оюндар конфедерациясынын жыйынында кабыл алынды.
Жыйынга Кыргызстан, Казакстан, Россия, Өзбекстан, Тажикстан, Афганистандан өкүлдөр катышкан. Кыргызстандан Көк бөрү федерациясынын президенти Искендер Кадыркулов жана ЖК депутаты, Дүйнөлүк көкпар ассоциациясынын вице-президенти Канат Исаев барган.
Посмотреть эту публикацию в Instagram
Иш-чарада быйылкы Көчмөндөр оюндарындагы көк бөрүнүн эрежеси талкууланып, тай казан маселеси талаш жаратты. Кыргыз тарап оюн кызыктуу болушу үчүн тай казан менен өткөрүү керектигин баса белгиледи. Бирок бул сунушту башка өлкөлөр колдогон жок, негизги жүйө катары мындай оюн кооптуу деп айтылды. Ошондой эле былтыр Астанада негизделген Дүйнөлүк көкпар ассоциациясы тай казансыз ойноо эрежесин киргизгени болду.
Азырынча бул боюнча өлкөнүн Көк бөрү федерациясынан комментарий алууга мүмкүн болбой жатат.
Тай казан чуусу бир жылдан бери талаш жаратып келүүдө. Бирок кыргыз тарап буга чейин Көчмөндөр оюндарында көк бөрү кандай өтүп келсе, мында да ошол эреже менен ойнолорун билдирген.
