БИШКЕК, 15-фев. — Sputnik. Көкпар боюнча Дүйнөлүк ассоциацияга кирген 10 өлкө Астанада көкпар оюнунун эл аралык эрежесин кабыл алды. Бул туурасында Sputnik Казакстан "Хабар 24" каналына шилтеме берүү менен билдирди.
Казакстандын улуттук жана ат спортунун түрлөрү боюнча республикалык борборунун директору Аманжол Хасенов аттар жана улакчылар катуу жаракат алып жаткандыктан тай казандан баш тартылганын белгилеген.
"Көкпар боюнча Дүйнөлүк ассоциация коопсуздук жана оюндун кызыктуулугун арттыруу үчүн жаңы эреже түздү. Динамика жана ылдамдык оюнду кызытат. Ошол эле учурда оюнчулардын коопсуздугун сакташ керек. Аны үчүн атайын форма жана баш кийим менен камсыздалат", — деп айткан Хасенов.
Белгилей кетсек, 8-9-январь күндөрү Ташкентте Эл аралык көк бөрү федерациясынын конгресси өтүп, ага Кыргызстан, Казакстан, Тажикстан, Өзбекстан, Россиянын субъектилери (Татарстан, Иркутск, Красноярск, Алтай, Новосибирск) Монголия, Афганистан, АКШ жана Түркия мамлекеттери катышкан. Иш-чарада быйыл күздө Өзбекстанда өтө турган көк бөрү боюнча дүйнө чемпионатынын эл аралык эрежеси (тай казан менен ойноо) бекитилген.
