Секелек кыздарда кайдагы допинг? Путин WADA чечими боюнча жооп берди

Жазылуу
Путин Россиянын Олимпиада боюнча улуттук комитетине доомат жоктугун, мындай учурда Россия өзүнүн желеги менен эл аралык мелдештерге катыша аларын айтты.

БИШКЕК, 19-дек. — Sputnik. Дүйнөлүк антидопинг агенттигинин (WADA) Россияны төрт жылга негизги спорттук иш-чаралардан четтетүү чечими акылга сыйгыс нерсе. Мындай пикирин Россия президенти Владимир Путин Москва шаарында өтүп жаткан маалымат жыйыны учурунда билдирди.

"Мындай кырдаал адам баласынын тарыхында болгон эмес, мындан ары болбойт деп ишенем. Ар бир жаза индивидуалдуу болуш керек. Эгер кайсы бир спортчу мыйзам бузган болсо, далилдешсин. Аны жазалоого өзүбүз деле кызыкдарбыз", — деди Путин.

Президент мунун артынан россиялык бардык спортчулар азап чегип жатканына нааразы болду.

Убалга калган төрт жыл. WADA чечиминин өзөгүндө эмне бар? Видео - Sputnik Кыргызстан
Убалга калган төрт жыл. WADA чечиминин өзөгүндө эмне бар? Видео
"Мисалы, көркөмдөп муз тебүүдө жалаң секелек кыздар жүрөт, керек болсо алар дагы деле бала бойдон. Анан кайдагы допинг тууралуу сөз кылышыбыз керек? Алар бир секиргенде төрт ирет айланып түшүп жатышат. Мындайды дээрлик эч ким кыла элек. Анан, албетте, ушундай жол менен четтетип жатышат", — деди президент.

Мындан тышкары, Путин "Россиянын Олимпиада боюнча улуттук комитетине доо жок, доомат болбосо, демек, Россия өзүнүн желеги менен чыгышы керек" деген оюн кошумчалады.

Белгилей кетсек, өткөн аптада WADA көз карандысыз комитеттин сунушун кабыл алып, россиялык спортчуларды төрт жылга бардык эл аралык мелдештерден, ошондой эле Олимпиада жана Паралимпиада оюндарынан четтетти. Эми спорттук иш-чараларга "таптаза" спортчулар нейтралдык макам менен гана катыша алат.

Жаңылыктар түрмөгү
0