Айып пулдар электрондук кол тамга менен тастыкталгандан кийин ИИМдин ЖКККББга караштуу мониторинг борборунан "Кыргызпочтасы" ишканасына өткөрүп берилет. Андан соң почта кызматкерлери айдоочунун жашаган дарегине жеткирип беришет. Бул тууралуу Мимоза Жээнбекова Sputnik Кыргызстан радиосунун таңкы эфиринде маек куруп жатып билдирди.
Анын айтымында, мындай тартип Эреже бузуулар кодексинин 312-беренесине ылайык келет.
"Айдоочу жол эрежесин бузуп, ага айып пул каралган убакта бул тууралуу дүмүрчөк каттар бизге келип түшөт. "Кыргызпочтасы" ишканасынын кызматкерлери ал каттарды үч күндөн сегиз күнгө чейинки аралыкта жеткирип берүүгө милдеттүү. Жөн эле айдоочунун дарегине алып барып койбой, ошол жаран алгандыгын тастыктап кол коюп берүүсү зарыл. Ошол күндөн тарта, тактап айтканда, өзүнө салынган айып пул тууралуу катты айдоочу колуна алгандан баштап анын төлөө мөөнөтү эсептелет. Бул каттар почтада 30 күн сакталат. Эгер айдоочу үйүндө жок болуп калса, айдын экинчи он күндүгүндө почта кызматкери кайрадан билдирүүнү жеткирип берет. Ал аралыкта дагы айдоочуга айып пул салынгандыгы тууралуу билдирүүнү берүү мүмкүн болбосо, анда каттар ЖКККББга кайтарылат", — деди Жээнбекова.
Ал камерага катталган айдоочу эреже бузган же бузбаганын аныктоого ЖКККББнын мониторинг борборунун кызматкерлерине үч күн берилерин кошумчалады.
