БИШКЕК, 13-апр. — Sputnik. Мамлекеттик мүлк фондунун мурдагы жетекчи орун басары Бакытбек Мураталиев 12-апрелде убактылуу кармоо жайына киргизилди. Бул тууралуу ИИМден кабарлашты.
Кылмыш ишин козгоого баштапкы баасы 242 миллион сомду түзгөн Бакиевдердин VIP-шаарчасынын 142 миллион сомго сатылып кетиши себеп болгон.
ИИМ аталган факты боюнча Кылмыш жаза кодексинин 304 (кызматтык абалын кыянаттык менен пайдалануу) жана 307-беренелеринин (менчиктештирүү, салык, бажы жана уруксат лицензиясын берүүдө кызматтык абалын кыянаттык менен пайдалануу) негизинде кылмыш ишин козгоду. Учурда тергөө иштери уланып жатат.
Ушундай эле беренелер боюнча аталган фонддун мурдагы жетекчиси Болсунбек Казаков айыпталып, убактылуу кармоочу жайдан тергөө абагына киргизилди.
