БИШКЕК, 3-апр. — Sputnik. Президент Сооронбай Жээнбеков ички иштер министри Улан Исраиловду кабыл алганын өлкө башчынын маалымат кызматы билдирди.
Министр 2018-жылдын 8-февралында Коопсуздук кеңешинин чечими менен ички иштер органдарынын алдына коюлган олуттуу милдеттерди ишке ашыруу жана кылмыштуулукка каршы күрөшүү боюнча ыкчам чаралар тууралуу маалымат берди.
Жолугушуу учурунда Жээнбеков ички иштер органдары коррупцияга каршы күрөшүү боюнча ишти күчөткөнү байкалып жатканын белгиледи.
"Бирок алдыга коюлган конкреттүү максаттарга жетиш үчүн дагы көп иштеш керек", — деди президент.
Мамлекет башчысы ИИМ системасында коррупция деңгээли жогору экендигин, милиция кызматкерлеринин көп сандаган мыйзамсыз аракеттерин тастыктаган статистикалык маалыматтарды келтирип өттү.
Мындан тышкары, президент министрден алдыга коюлган милдеттерди ишке ашырууну басаңдатпастан, ички иштер органдарындагы коррупциялык көрүнүштөрдү жоюу боюнча катуу чараларды колдонууну, калк менен тыгыз иштешүүнү талап кылды.
