БИШКЕК, 4 –дек. — Sputnik маалымат кызматы. Sputnik Кыргызстан маалымат агенттиги жана радиосунда "Кыргызстандагы гендердик теңчиликти жайылтуу" деп аталган сынактын жеңүүчүлөрүнө белектер менен сертификаттар салтанаттуу түрдө тапшырылды. Аны БУУнун азык-түлүк программасы КРдин Эмгек жана социалдык өнүгүү министрлигинин колдоосу менен өткөрүүдө.
БУУнун Азык-түлүк программасынын, Sputnik Кыргызстан маалымат агенттиги менен радиосунун, Эмгек жана социалдык өнүгүү министрлигинин өкүлдөрүнөн турган комиссия түшкөн 20 материалдын ичинен мыкты делген 10 эмгекти тандап алды.
Сынак комиссиясынын мүчөлөрү мыкты деген материалдарды тактыгы, шексиздиги, маанилүүлүгү, жасалган анализдин тереңдиги жана өзгөчө ыкмада жазылгандыгы менен баалады.
"Кыргызстандагы гендердик теңдикти электрондук ЖМКлар (жаңылык агенттиги, блогдор) арасында мыкты чагылдырганы" үчүн
1-орунду: Нуржан Токтоназарова /Azattyk;
2-орунду: Ныяз Ташматов/"ОшПирим";
3-орунду: Элвира Байсаева/Cabar_IWPR;
Кызыктыруучу сыйлык: Алина Жетигенова/Sheisnomad ээледи.
"Кыргызстандагы гендердик теңдикти басылмаларда мыкты чагылдырганы" үчүн
1-орунга Светлана Бегунова/"Новые лица";
2-орунга Лейла Саралаева/"Новые лица";
3-орунга Алмаз Исманов/ "Новые лица" татыды.
"Кыргызстандагы гендердик теңдикти радио жана ТВда мыкты чагылдырганы" үчүн
1-орун Салабат Эркетаева/Элтр;
2-орун Эрмек Актанов/Биринчи радио;
3-орун: Элиза Акжолтоева/Марал FM журналистине берилди.
БУУнун Азык-түлүк программасынын өлкөлөр боюнча Кыргызстандагы өкүлү Кейко Изуши мындай конкурстардын болуп турушу маанилүү экендигине токтолду.
"ЖМК гендердик теңдикти же өрчүтөт, же социалдык өзгөрүүгө алып келип, ал эркектер менен аялдардын, кыздар менен балдардын ортосундагы теңдик мамилелерди көрсөтөт. Биздин уюм аялдар, эркектер, кыздар, балдар өзүнүн келечегин камсыздоого бирдей мүмкүнчүлүк алып, ресурстарга бирдей жетсе гана ачарчылык нөлгө барабар болот", — деди Изуши.
Ал эми Sputnik Кыргызстандын жетекчиси Елена Череменина агенттик мындай багыттагы долбоорлорду колдоого дайым даяр экендигин билдирди.
"Sputnik Кыргызстан өнүгүүгө жетелеген долбоорлорду, демилгелерди колдоого ынтызар. Кесипкөй журналистиканын артышын жана анын берилишине өзгөчө кызыкдар болгондуктан мындай сынак үчүн БУУнун Азык-түлүк программасына ыраазычылык билдиребиз", — деди Череменина.
Кыргызстандын медиа айдыңында Sputnik Кыргызстан ишин 2014-жылдын декабрь айында баштаган. Ал кыргыз жана орус тилдеринде иш алып барып барат, агенттиктен сырткары радио жана жогорку технология менен камсыздалган мультимедиалык маалымат борбору бар.
Sputnik (sputniknews.com) – ондогон өлкөдө жайгашкан мультимедиалык маалымат хабдары бар маалымат агенттиги жана радиосу. Sputnik өзүнө 30 тилден ашуун жазылган сайттарды, аналогдук жана санарип радиоберүү, мобилдик тиркеме жана социалдык тармактардагы баракчаларды камтыйт. Sputnik агенттигинин жаңылык түрмөгү күнү-түнү араб, англис, испан жана кытай тилдеринде жарык көрөт.
