БИШКЕК, 21-сен. — Sputnik. Sputnik Кыргызстан агенттиги жана радиосу мамлекеттик тилдин өнүгүшүнө салым кошкондугу үчүн Билим берүү жана илим министрлигинин ыраазычылык каты менен сыйланды.
Мамлекеттик тил күнүнө карата сыйлыктарды тапшыруу аземи билим берүү министри Гүлмира Кудайбердиеванын катышуусунда өттү.
Министр Sputnik Кыргызстан агенттигинин Төлөгөн Касымбековдун "Сынган кылыч" тарыхый романы боюнча ишке ашырган инновациялык долбооруна жогорку баасын берди.
Sputnik Кыргызстан агенттигинин жетекчиси Елена Череменина сыйлык редакция үчүн чоң мааниге ээ экенин билдирди.
"Sputnik өлкөнүн маалымат айдыңында үч жылга жакын убакыттан бери иштеп келет. Бул убакыт аралыгында агенттиктин жамааты кыргыздардын маданияты, тили, салт-санаасы тууралуу көптөгөн кызыктуу материалдарды даярдады. Биздин эмгекке жогорку баа берилгенине ыраазычылык билдиребиз. Мындан башка дагы көптөгөн жаңы долбоорлорубуз бар, алардын бардыгын окурмандар менен угармандарга кызыктуу кылып даярдоого аракет жасайбыз", — деди Череменина.
Sputnik Кыргызстан өз ишин 2014-жылдын декабрь айында баштаган. Агенттикте кыргыз жана орус тилиндеги портал, радио ресурс, мультимедиалык жогорку технологиялуу пресс-борбор бар. Sputnik Кыргызстан жаңылыктар порталы өлкөдөгү интернет-ЖМКлардын арасында алдыңкылардан болуп келе жатат.
Sputnik (sputniknews.com) – ондогон өлкөдө жайгашкан мультимедиалык маалымат хабдары бар маалымат агенттиги жана радиосу. Sputnik өзүнө 30 тилден ашуун жазылган сайттарды, аналогдук жана санарип радиоберүү, мобилдик тиркеме жана социалдык тармактардагы баракчаларды камтыйт. Sputnik агенттигинин жаңылык түрмөгү күнү-түнү англис, испан жана кытай тилдеринде жарык көрөт.
