БИШКЕК, 16-ноя. — Sputnik. "Манас" аэропортун масштабдуу түрдө реконструкциялоо жана модернизациялоо иштери башталды. Бул тууралуу Аэропортторду өнүктүрүү боюнча дирекциянын жетекчиси Абдималик Бусурманкулов айтып берди.
Эскерте кетсек, "Манас" аэропортундагы көзөмөл пунктуларындагы кезектин көптүгү, күтүү залдарынын ыңгайсыздыгы жана лицензиясы жок таксисттерге карата көптөгөн сындар айтылып келген. Июль айынын башында "Манас" аэропортуна учуп келгендер узун кезек күтүп, элдин чарчаганын чагылдырган видео социалдык тармактарга чыккан. Андан соң өткөн айдын башында премьер-министр Сапар Исаков аэропортко күтүүсүздөн барып текшерип ыңгайсыздыктарды жоюуну тапшырган.
Бусурманкуловдун айтымында, "Манас" аэропортун масштабдуу түрдө реконструкциялоо жана модернизациялоо бир нече жылдардан бери жүрүп келет. Азыркы учурда аэропорт ичинде жүргүнчүлөргө ыңгайлуу шарт түзүү үчүн күтүү жайлары кеңейтилип, текшерүү пунктуларынын саны көбөйүп, кезекти иреттей турган атайын тосмолор орнотулган.
"Жүргүнчүлөргө ыңгайлуу шарт түзүү үчүн болгон аракетибизди жумшап жатабыз. Азыр жумуштардын бир бөлүгү аткарылып бүтүп, аны менен бирге эле жаңы долбоорлор иштелип жатат. Азырынча кошумча паспорттук көзөмөл пунктулары орнорулду. Кезекти азайтуу үчүн курулган атайын тосмолор жыйынтыгын берип жатат. Колунда баласы бар жүргүнчүлөр үчүн өзүнчө жол жасап, аны менен бирге алар үчүн атайын эс алуу бөлмөсүн курдук. Аэробекеттин батыш жана чыгыш канатындагы күтүү бөлмөлөрүн кеңейттик", — деди Бусурманкулов.
Жетекчи кийинки жылы аэропорттун шартын жакшыртуу үчүн бир топ долбоорлор иштелип жаткандыгын белгиледи.
Ал эми Манас" аэропортунун чек ара көзөмөл бөлүмүнүн башчысы Камчыбек Султаналиев аэропортто "Таза коом" долбоорунун алкагында паспорт текшерген электрондук кабиналар орнотуларын белгиледи.
"Азыр бир паспортту текшерүү 50 секундга жакын убакытты алат. Январь айынын башында "Манаста" үч, Оштогу аэропортто эки электрондук кабина орнотулат. Булардын өзгөчүлүгү биометрикалык паспорту бар жарандар күзөт кызматкери менен жолукпай эле, кабинага кирип паспортун коюп, бармагын басышы керек. Ошондо ал бир секунддун ичинде текшерүүдөн өтөт. Бул дүйнөдө сейрек кездешкен жаңылык", — деди чек ара көзөмөл бөлүмүнүн башчысы.
"Манас" аэропортунун жагымсыз көрүнүштөрүнүн бири болгон лицензиясыз таксисттер маселеси да чечилип жаткандыгы айтылды. Аба транспортундагы милиция бөлүмүнүн башчысы Виктор Малышев Кайгуул милиция жана Салык кызматы менен бирге жеке таксисттерге каршы күрөшүп жатышкандыгын айтты.
"Башынан бери эле бул көйгөй менен күрөшүп келебиз. Мурда 100дөн ашуун лицензиясыз таксист болсо, азыр 50гө жакыны калды. Өткөн жумада эле алты таксистке айып салдык. Бара-бара азаят деп айта алам",— деди Малышев.
Маалыматка ылайык, 2017-жылдын жыйынтыгында реконструкцияга 28 миллион сомдон ашык акча инвестиция жасалган. Алдыдагы жылдары дагы миллиард сомго жакын каражат тартуу пландалып жатат.
