БИШКЕК, 24-авг. — Sputnik. Мексикадагы Diario de Acayucan басылмасынын кабарчысы Кандидо Риос Васкес өлтүрүлдү. Ал жыл башынан бери киши колдуу болгон журналисттердин 10чусу болгонун РИА Новости агенттиги Unvision басылмасына таянуу менен жазып чыкты.
Билдирүүгө ылайык, журналист Мексиканын батышындагы Веракрус штатында шейшемби күнү атып өлтүрүлгөн. Аны менен кошо дагы эки киши жок кылынган, бирок прокуратура кошумча маалымат бере элек.
Ал эми Синалоа штатынын Кулиакан шаарында баңгизат темасын көп чагылдырып келген журналист Хавьер Вальдем өлтүрүлгөн. Ошондой эле Jornada басылмасынын кабарчысынын өлтүрүлүшү да коомдо бир топ нааразычылыктарды жараткан.
Мексиканын журналисттер коомунун маалыматы боюнча 2000-жылдан бери 120 журналист өлтүрүлүп, 20сы дайынсыз жоголгон. Андан сырткары, 50 жолу кол салуу катталган.
