БИШКЕК, 21-май — Sputnik. Венесуэланын президенти Николас Мадуро Мексиканы банкрот-мамлекет деп атады. Бул тууралуу РИА Новости маалымат агенттиги билдирди.
"Мексика зомбулуктун, тең укуксуздуктан жана наркотрафиктин айынан банкрот-мамлекетке айланды", — деген пикирин ал улуттук телеканалдын түз эфиринде айтты. Бирок, учурда Венесуэланын өзүндө коомдогу абал чыңалып, өкмөттүн саясатына карата массалык акциялар уюштурулуп, ал 45 кишинин өмүрүн алган.
Буга чейин Мексика Латын Америкасындагы бир катар мамлекеттер менен биргеликте Венесуэла бийлигин каршылык акциясына чыккандарга күч колдонгонун кескин сындаган болчу.
"Трамп Мексикага бастырып кирип жатат, бирок Мексикада өз жарандарын коргоп алчу өкмөт жок", — деди Мадуро.
Ал ошондой эле АКШ президенти Дональд Трампты Венесуэланын ички ишине кийлигишпөөнү өтө орой формада талап кылганын РИА Новости агенттиги жазды.
