БИШКЕК, 17-май — Sputnik. АКШнын конгрессинин мамлекеттик реформа жана көзөмөл комитети менен сенаттын юридикалык комитетине кирген демократтар президент Дональд Трамп, юстиция министри Джефф Сешнс жана Ак үйдөгү жогорку даражадагы аткаминерлерге карата териштирүү жүргүзүүнү талап кылууда. Бул туурасында РИА Новости жазып чыкты.
Hill басылмасынын маалыматы боюнча эки комитеттин 33 демократ мүчөсү кайрылуу кагазына кол коюшкан.
"Дональд Трамп менен анын айланасындагы мансаптуу чиновниктер ФБРдин иликтөөсүнө бут тосуп жатышы ыктымал деген маалыматты мамлекеттик реформа жана көзөмөл комитети менен юридикалык комитет иликтөөгө алуусун суранабыз. Трамптын президенттик кампаниясы менен россиялык чиновниктер менен болгон мамилеси ачык иликтениши керек", — деп кайрылууда жазылган.
Белгилей кетсек, Дональд Трамп өткөн жумада ФБРдин директору Жеймс Комини "милдетин так аткарган эмес" деген кине менен кызматтан алган.
Коми Трамптын кызматкерлерине каршы туруп Ак үй да, Кремль да төгүндөп келген "Россия менен байланыштуу" иштерди иликтеп жаткан. Ошондой эле Хиллари Клинтон да 2016-жылы өткөн президенттик шайлоодо өзүнүн жеңилип калуусуна Коминин тиешеси болгон деп айыптап келет.
