БИШКЕК, 3-фев. — Sputnik. Ат-Башы районунун Казыбек айылында жергиликтүү тургундар үчүн чакан муз аянтча ачылды. Бул туурасында Sputnik Кыргызстан агенттигине аталган аянтчанын ээси Алтынбек Абасов билдирди.
Анын айтымында, муз аянты тургундарды спортко үндөө максатында ачылган.
"Бул аянтча ачылганга чейин эле айылдагы балдар менен түзгөн хоккей командабыз бар болчу. Ал убакта айыл четиндеги сайга тоңгон музга машыкчубуз. Кийин Нарын шаарындагы муз аянтынын эски бортун сатып келдик. Бирок сууну агызып ийбей, улам тоңдуруп туруу кыйын болду", — деди Абасов.
"Бул жакка азыр жаш балдардан тарта, чоңдорго чейин келип муз тээп жатышат. Дем алыш күндөрү 100гө чукул адам келет. Атайын үйрөткөн машыктыруучу же инструктор деле жок. Конькилер бутка ыңгайлуу болгондуктан балдар өздөрү эле үйрөнүп алып жатат", — деди Абасов.
Ал белгилегендей жакында хокей боюнча райондор аралык мелдеш өткөнү жатат.
