Элмира Шерипова: "Семетей" мейманканасында 40 киши жашап жатат
Дача айылындагы авиакырсыктын кесепетинен турак-жайы кыйраган 40 адам "Семетей" мейманканасында жашап жатат. Бул тууралуу ӨКМ маалымат катчысы Элмира Шерипова билдирди.
Эскерте кетсек, 16-январь күнү эртең менен Гонкогдон Стамбулду көздөй келе жаткан Boeing-747 учагы Дача айылына кулап, кырсыктан 39 кишинин өмүрү кыйылган.
Өкмөт баш паанексиз калган адамдарды убактылуу "Семетей" мейманканасына жайгаштыруу чечимин кабыл алган.
"Мейманканада учурда 13 үй-бүлө — 40 киши жашап жатат. Анын 25и — улуу курактагы адамдар болсо, 15и — жаш балдар. Баары тамак-аш, керектүү азык-түлүк менен камсыз болгон", — деди Шерипова.
Бул адамдар кайсы убакытка чейин мейманканада жашай турганы азырынча чечиле элек.
