БИШКЕК, 5-сен. — Sputnik. Санкт-Петербургда кыргызстандык таксисттин сабалышы боюнча факты шаардык полицияга берилгенин Кыргызстандын Россиядагы элчилиги билдирди. Азырынча кылмыш иши козголо элек.
Маалыматка ылайык, 45 жаштагы таксистти азият улутундуга үч жүргүнчү үйлөрдүн короосунун бирөөнө айдатып кирип, өзүн сабап машинасын тартып алышкан. Машинанын артында отурган бирөө сактык курун айдоочунун мойнуна оросо, алдыңкы орунда отурган экинчиси ага тапанча такаган. Бейтааныш жүргүнчүлөр таксисти түшүрүп, машинасын айдап кетишкен. Окуя дүйшөмбү күнгө караган түнү болгон.
"Элчилик Санкт-Петербург шаарынын полициясынын башчысына расмий сурам жөнөтүп, ишти ачык-айкын иликтөөнү суранды", — деп айтылат маалыматта.
Элчилик бул окуяны көзөмөлгө алды. Полиция диспетчердик кызмат аркылуу такси чакырган кишинин дайын-дарегин аныктоо аракеттерин көрүүдө.
