БИШКЕК, 28-июл. — Sputnik. Жалал-Абаддын Сузак районунда жалгыз бой аялдардын үйүнө кирип, коркутуп-үркүтүү менен карактап келген деген жаран кармалды. Бул тууралуу облустук ички иштер башкы башкармалыгы билдирди.
Маалыматка ылайык, кылмышка шектүү киши бет кап кийип түн ичинде аймактагы беш үйгө кирип, үй ээсинин мойнуна бычак такап коркутуп, акчасын, зер буюмдарын алып кеткен.
"Ал аялдарды "бирөөгө айтсаң өлтүрөм" же "акча таппасаң зордуктап салам" деп опузалаган", — деп айтылат билдирүүдө.
Жабыр тарткан жарандар милицияга арыз менен кайрылып, аталган фактылар боюнча Кылмыш жаза кодексинин 167-беренесинин 4-бөлүмүнүн 1-пункту (Тоноо) менен кылмыш иши козголгон.
Иликтөө иштеринин натыйжасында 26-июль күнү аталган кылмыштарга шектүү катары Сузак районунун 19 жаштагы тургуну кармалды. Учурда тергөө амалдары жүрүп жатат.
