БИШКЕК, 5-сен. — Sputnik. Кыргызстандык жаран башында турган радикалдык топ учакты уурдап, 2001-жылдын 11-сентябрындагыдай коомчулуктун үшүн алган террордук аракеттерди жасоону пландап жүргөнүн "Новости Казакстан" маалымат агенттиги өлкөнүн Улуттук коопсуздук комитетине шилтеме берүү менен билдирди.
Кыргызстандын жараны жана буга чейин жасаган кылмышы үчүн соттолгон эки казакстандык 18-августта кармалган.
"Алар жыйындарынын биринде Кыргызстандын жаранын башчы кылып шайлап, калган мүчөлөрү башка орундарды өз ара бөлүштүрүп алышкан. Ошондой эле топ мүчөлөрүнүн бири жан кечтилик аракетке да даяр экенин билдирген", — деп айтылат билдирүүдө.
Алар ар бир жардыруу аракеттеринин алдында чакан видео ролик тартип, эмне себептен мындай кадамга барганын жаздырып, аны интернетке жарыялашмак.
Курал-жаракты сатып алуу үчүн алар дыйкандар менен чакан насыя уюмдарынын башчыларын тоноону да пландашкан. Тинтүү учурунда колго жасалуучу жардыруучу затка колдонулуучу химиялык элементтер, курал жана экстремисттик адабияттар алынган. Учурда алардын үстүнөн тергөө амалдары жүрүүдө.
