БИШКЕК, 2-сен. — Sputnik. Өзбекстандын президенти Ислам Каримов дүйнө салды. Бул тууралуу РИА Новости маалымат таратты.
Буга чейин анын кызы Лола Каримова-Тиллаева Каримовдун мээсине кан куюлуп, ооруканага түшкөндүгүн кабарлаган. Ал эми айрым жалпыга маалымдоо каражаттары бир нече күн мурун эле анын каза болгондугун жазып чыгышкан. Ал эми бүгүн Өзбекстандын өкмөтү Ислам Каримовдун абалы кескин начарлагандыгы боюнча маалымат тараткан.
"Өзбекстандын президенти Ислам Каримов 78 жашында көз жумду", — деп айтылат маалыматта.
Каримовду акыркы сапарга узатуу зыйнаты кичи мекени Самарканд шаарында 3-сентябрь күнү болот. Иш-чараны уюштуруучу комиссияны Өзбекстандын өкмөт башчысы Шавкат Мирзиеев жетектейт.
Президенттин өлүмүнө байланыштуу өлкөдө үч күн аза күтүү болот.
