БИШКЕК, 10-июл. — Sputnik. Футбол боюнча Европа чемпионаты аягына келип калды. 10-июлда боло турчу финалдык беттеште Португалия менен Франциянын курама командалары биринчилик үчүн ат салышат.
Беттеш Париждин четиндеги Сен-Дени аймагындагы "Стад де Франс" стадионунда жергиликтүү убакыт боюнча саат 21.00дө өтөт. (Бишкек убактысы боюнча 11-июль, түнкү саат 1.00). Оюнга Марк Клаттенбург башында турган англиялык калыстар көз салат.
Эгер француздар утушса алардын өз үйүндө жеткен үчүнчү жеңиши болуп калат. Буга чейин алар 1984чү жана 1998-жылдары жеңишке жеткен.
Каршылаштар тууралуу айта турган болсок, быйыл беттеште француздар 18 жолу жеңишке, бир жол тең чыгып, 5 жолу утулуу ызасын тарткан. Акыркы жолу португалиялыктар француздарды 41 жыл мурун башкача айтканда учурдагы футбол жылдызы Криштиану Роналду төрөлө электе утушкан. Андан бери алар француздардан 10 жолу катары менен утулушкан. Акыркы жолу эки команда 2006-жылы дүйнө чемпионатынын жарым финалында кездешкен. Анда Зинедин Зидандын бир голу француздарды алдыга алып чыккан.
