БИШКЕК, 8-июн. — Sputnik. Бишкек мэриясы КР Маданият министрлиги менен "Гүлбак — 1916" паркына коюла турчу эстеликке конкурс жарыялаганын шаардык муниципалитет билдирди.
Эстелик 1916-жылдагы трагедиялуу окуяларга байланыштуу болушу керектигин калаа башчысы Албек Ибраимов аталган аймакка барганда билдирди. 1916-жылдагы окуяларга арналган гүлбактын айланасы былтыр тосулуп, жашылдандырылган. Ал жакта эстелик коюла турчу жерге 1994-жылы таш орнотулган.
Мэриянын билдиришинче 2008-2009-жылдары Нариман Түлеев мэр болуп турганда парк боло турчу жер тилкеси ишкерлерге 49 жылга ижарага берилген. 1916-жылдагы каргашалуу окуянын курмандыктары үчүн эстелик коюу үчүн жер шаардын башка тарабынан берилген.
Бирок президенттин 1916-жылдагы окуялардын 100 жылдыгы жөнүндөгү буйругу чыккандан кийин, эстелик коюу үчүн буга чейин берилген жерди сактоо чечими кабыл алынган.
