БИШКЕК, 28-мар. — Sputnik. Дастан Сарыгулов Улуттук коопсуздук боюнча мамлекеттик комитетке алып келинди деп мекеменин маалымат кызматы билдирди.
"Сарыгулов сүйлөшүү үчүн алып келинген", — деп УКМКдан маалымдашты.
26-мартта YouTube каналына чыккан аудиодо Эрнест Карыбеков, Дастан Сарыгулов, Тургун Нурматов жана Камчы делген кишилер министрликтер менен ведомствону бөлүштүрүп жатканы талкууланат. Ошондой эле алардын сүйлөшүүсү учурунда Ыргалай деген ысым да аталат.
Буга чейин Сарыгулов аталган аудио боюнча Sputnik Кыргызстан маалымат агенттигине пикирин билдирип, чындыгында оппозиция өкүлдөрүнүн ортосунда сүйлөшүү болгонун билдирген.
"Элдик курултайдын катчылыгынын өкүлдөрү сүйлөшкөнбүз. Мындан бир айдай мурун биз өкмөттө кызматтар үчүн кишилердин талапкерлигин сүйлөшкөнбүз. Бул демек, биз бийликти басып алып, өз кишилерибизди коелу дегендикке жатпайт. Эгер учурдагы өкмөт отставкага кетсе, биз Жогорку Кеңешке өкмөттүн жаңы курамын курултайдын атынан сунуштайбыз. Азыр өкмөт анчейин жакшы иштебей жатат деп айтышууда. Андыктан ушундай маселени талкуулаганбыз", — деп ал айткан болчу.
Белгилей кетсек, буга чейин оппозиция өкүлдөрү — Бектур Асанов, Кубанычбек Кадыров жана Эрнест Карыбеков бийликти күч менен басып алууну пландаган деген шек менен кармалып, 12-майга чейин камакка алынган болчу. Ал эми Дуулатбек Турдуналиев издөөгө алынган.
