Дастан Сарыгулов "оппозициянын бийлик бөлүшкөн" аудиосу тууралуу айтып берди

БИШКЕК, 27-мар. — Sputnik. Интернетте "Оппозиция бийлик бөлүштүрүп жатат" деген жаңы аудио тарады.

26-мартта YouTube каналына чыккан аудиодо Эрнест Карыбеков, Дастан Сарыгулов, Тургун Нурматов жана Камчы делген кишилер министрликтер менен ведомствону бөлүштүрүп жатканы талкууланат. Ошондой эле алардын сүйлөшүүсү учурунда Ыргалай деген ысым да аталат.

Аудио жазууда негизинин өлкөнүн күч түзүмдөрүнө (ИИМ, УКМК, Башкы прокуратура) келчү талапкерлер тууралуу сөз болот.

Коомдук ишмер, мурдагы мамлекеттик катчы Дастан Сарыгулов интернетке тараган аудио жазуу боюнча кабары жок экенин, бирок, ушундай сүйлөшүү болгонун айтты.

"Элдик курултайдын катчылыгынын өкүлдөрү сүйлөшкөнбүз. Мындан бир айдай мурун биз өкмөттө кызматтар үчүн кишилердин талапкерлигин сүйлөшкөнбүз. Бул демек, биз бийликти басып алып, өз кишилерибизди коелу дегендикке жатпайт. Эгер учурдагы өкмөт отставкага кетсе, биз Жогорку Кеңешке өкмөттүн жаңы курамын курултайдын атынан сунуштайбыз. Азыр өкмөт анчейин жакшы иштебей жатат деп айтышууда. Андыктан ушундай маселени талкуулаганбыз", — дейт Сарыгулов.

УКМКнын маалымат катчысы Рахат Сулайманов Интернетте тараган аталган аудио жазууну текшерүү боюнча маселе эртең карала турганын билдирди.

21-мартта Интернетте Кубанычбек Кадыров, Дуулатбек Турдуналиев менен Бектур Асановдун бийликти басып алуу боюнча сүйлөшүп жатат деген видеосу тараган. Видеодо алар бийликти басып алуунун жолдорун жана акчаны бөлүштүрүүнү талкуулашкан. Оппозициянын өкүлдөрү аталган видео монтаж экенин билдиришкен.

24-мартта Кубанычбек Кадыров менен Бектур Асанов УКМКнын кызматкерлери тарабынан кармалган. Алардын башк коргоо чарасын караган Биринчи Май райондук соту аларды 12-майга чейин камакка алуу чечимин чыгарды. 

Андан кийин УКМК Эрнес Карыбековду дагы бийликти басып алууга шектүү катары кармаган. Сот дагы аны 12-майга чейин камакка алуу чечимин чыгарган.