БИШКЕК, 18-мар. — Sputnik. Ишкер Тимур Тойчубеков дагы бир айга камакта калат деген маалыматты Экономикалык кылмыштуулукка каршы күрөшүү боюнча мамлекеттик кызматы тастыктады.
Мындай чечимди Биринчи Май райондук соту чыгарды. Өкүм чыгарылгандан тарта күчүнө кирет.
Мамлекеттик каржы рыногун башкаруу жана көзөмөлдөө кызматынын мурдагы башчысы Юруслан Тойчубековдун баласы Тимур Тойчубеков кечээ кармалган.
Экономикалык кылмыштуулукка каршы күрөшүү кызматынын маалыматы боюнча, эки фирманын жетекчилери акчаны алары менен кредит боюнча келишим мыйзамсыз деген Бишкек райондор аралык соттун чечимин жасалмалап, күрөөгө коюлган мүлктү үчүнчү жакка сатып жиберген.
Учурда ал убактылуу кармоо жайына камалып, иликтөө иштери жүрүүдө.
Тимур Тойчубековдун атасы Юруслан Тойчубеков "Элдик лотереяга" байланышкан чырдан улам былтыр жайында Мамлекеттик каржы рыногун башкаруу жана көзөмөлдөө кызматынын жетекчилигинен бошотулган. Тойчубековдун жактоочусу ал чет жакка дарыланганы кеткенден кийин кылмыш иши мыйзамсыз козголгонун айтып келет.
