БИШКЕК, 17-мар. — Sputnik. Ысык-Көл облусунун Түп районундагы Кең-Суу айылынын 88 жаштагы тургуну Жүзүмкан Ыбыке кызы быйыл ажылыкка барууну көздөйт. Бул тууралуу токсонго таяп калган байбиче Sputnik Кыргызстан маалымат агенттигине өзү билдирди.
Анын айтымында, жаштайынан эле ажылыкка барып, ибадат кылып келсем деп тилечү. Бирок, сегиз баланын түйшүгүн жалгыз тартып, ажылыкка баруу кыялын орундата албай келгенин кошумчалады.
"Абышкамдан 1983-жылы ажырап калдым. Ошондон бери сегиз баламды — төрт кыз, төрт уулду өзүм бактым. Аларды бутуна тургузайын деп көп жылдар бою колхоздо саанчы болуп иштедим. Азыр алардын улуусу 68 жашта, кичүүсү 47ге чыкты. Учурда ошол кичүү уулумдун колундамын. Азыр неберелеримдин балдарын көрүп, карылык доорун сүрүп жатам", — дейт ал.
Жүзүмкан апанын 45 небереси, тогуз чөбөрөсү жана төрт кыбырасы бар.
Байбиченин кичүү уулу Нурсултан Бектенов быйыл энесин ажылыкка жиберүүгө кам көрүп жатат.
"Чынында жол киреси кымбат экен. Ошол жагынан бир аз кыйналып жатабыз. Азыр туугандар аракет кылып, буюрса, жиберсек деген тилегибиз бар. Өзү да ажылыкка барып келсем деп тилеп жүрөт", — дейт ал.
Токсонго таяп калса да, баскан-турганы тың Жүзүмкан апа жакында эле неберелери менен үч күндүк дааватка чыгып келген.
"Молдонун окуусун окубасам дагы, парздардын бири болгон ажылыкты аткарсам дейм. Эки неберем менен дааватка да чыктым", — дейт Жүзүмкан апа.
Быйыл 2016-жылы Кыргызстан үчүн Сауд Аравиясы 3 685 орун бөлгөн. Кыргызстандык зыяратчыларды Сауд Аравиясынын Flynas авиакомпаниясы ташый турганын муфтияттан билдиришти.
