БИШКЕК, 15-мар. — Sputnik. Кыргызстандык спортчулар эркин, грек-рим жана кыз-келиндер күрөшү боюнча эл аралык лицензиялык турнирге катыша турганын Мамлекеттик жаштар иши, дене тарбия жана спорт агенттиги билдирди.
Мелдеш 18-20 март күндөрү Казакстандын борбору Астана шаарында өтөт.
Кыз-келиндер күрөшү боюнча Кыргызстандын атынан Айсулуу Тыныбекова жана Айсулуу Жеңишбек кызы барат. Кыздардын башкы машыктыруучусу — Нурбек Изабеков.
Алардан тышкары, грек-рим күрөшү боюнча Канатбек Бегалиевдин тарбиялануучулары Роман Царев, Атабек Азизбеков, Жанарбек Кенжеев, Узур Жузурбеков менен Мурат Рамоновдор күч сынашмакчы.
Жол кире жана турнирге даярдык үчүн 2 миллион сомду Олимпиада оюндары боюнча дирекция бөлүп берди.
Жайкы Олимпиада оюндары Бразилиянын Рио-де-Жанейро шаарында 5-21-август күндөрү өтөт. 28 спорттун түрү боюнча 306 медалдын комплектиси ойнотулат.
Буга чейин кыргызстандык спортчулар Дарья Маслова, Юлия Андреева жана Мария Коробицкая (жеңил атлетика) жана грек-рим күрөшү боюнча балбан Арсен Эралиев Олимпиадага катышууга уруксат берүүчү лицензияга ээ болушкан.
