Спорттук баяндамачы Кабыл Макешов 8-март айымдардын эл аралык майрамынын шаңы менен Кыргызстанды дүйнөгө тааныткан сегиз спортчу айым тууралуу кеңири маалымат берүүнү эп көргөн.
1. Москва олимпиадасынын чемпиону Татьяна Колпакова
1980-жылы Москва Олимпиадасында алтын медаль тагынып, кыргыз спортун дүйнөгө тааныткандардын бири, СССР спортуна эмгек сиңирген чебери Татьяна Колпакова 1959-жылы 18-октябрда Аламүдүн районунун Аламүдүн айылында туулган. Ал жеңил атлетика менен 1973-жылдан тарта машыга баштаган. Анын жеке рекорддору 6 метр 21 сантиметр менен башталып, үч жылда 7 метр 06 сантиметрге жеткен. Учурда Москва облусунда жашап, спорт мектебинде иштеп жүрөт. Ар жыл сайын Бишкекке келип турат. КРдин Жеңил атлетика федерациясынын демилгеси менен Колпакованын байгеси үчүн ар жылы Бишкекте эл аралык турнир өткөрүлүп келет. Кыргызстандын Улуттук Олимпиада комитетинин Алтын ордени жана СССРдин "Эл достугу" ордени менен сыйлаган.
2. Сеул олимпиадасынын чемпиону Мария Кулчунова (Пинигина)
1988-жылы Түштүк Кореянын Сеул шаарында өткөн жайкы олимпиадалык оюндарда жеңил атлетика боюнча олимпиада чемпиону болгон Мария Кулчунова 1958-жылы 9-февралда Нарын шаарында туулган. Ал чоң 1970-жылдары келген. Мария СССРдин курама командасынын катарында 1988-жылы Сеул олимпиадасында 4х400 метр аралыкка эстафеталык жарышта мөрөй талашып, олимпиадалык алтын медалга арзыган. Европа чемпиону болуп, дүйнөлүк чемпионатта коло медалга ээ болгон.
Мария чоң спорттон кеткени "Спартак" коомунда машыктыруучу, жаштарга насаатчы болуп, бай тажрыйбасын бөлүштү. Учурда үй-бүлөсү менен Якутск шаарында турат.
3.Сеул олимпиадасынын чемпиону Татьяна Сидоренко
Волейбол боюнча СССРге эмгек сиңирген спорт чебери, 1988-жылкы Сеул олимпиадасынын чемпиону Татьяна Сидоренко да 1966-жылы Бишкекте туулган. 1982-жылы Москва шаарында айтылуу "ЦСКА" командасында ойноп, жаштар арасында Европанын, СССРдин чемпиону болгон. СССРдин кубогун да утуп, СССР элдеринин спартакиадасынын чемпиону аталган. 1985-1992-жылдары жети жыл бою СССРдин тандалма командасынын чабуулчусу болгон. Ал Сеул олимпиадасында алтын медаль тагынса, Барселона олимпиадасында күмүш байгелүү болгон. Ошондой эле дүйнөнүн чемпиону болуп, дүйнө чемпионатында бир жолу күмүш, эки ирет коло медалга арзыган. Таня Европанын 3 жолку чемпиону. Союз ыдыраганы Италия, Хорватиянын бир нече клубдарында ойногон. Учурда Москвада жашап, орто мектепте дене тарбия мугалими жана машыктыруучу болуп иштейт.
4.Барселона олимпиадасынын чемпиону Елена Баранова
Баскетбол боюнча СССР эмгек сиңирген спорт чебери, Барселона олимпиадасынын чемпиону Елена Баранова 1972-жылы Бишкекте туулган. 14 жашында Бишкектин (Фрунзе) "Строитель" командасында ойноп, 15 жашында СССРдин өспүрүмдөр курама командасынын мүчөсү болгон. 17 жашында СССРдин курама командасына мүчө болуп, үч олимпиадага катышып, (1992-ж. Барселона, 1996-ж. Атланта, 2004-ж. Афина), Барселонада Шериктеш өлкөлөрдүн командасында ойноп, олимпиада чемпиону болгон. Дүйнөнүн эки жолку чемпиону (1998, 2002) болуп, дүйнө чемпионатында эки ирет күмүш медалга арзыган. Европанын 7 жолку чемпиону. Россиянын 6 жолку чемпиону жана 2002-2004-жылдары Россиянын кыз-келиндер курама командасынын капитаны болгон. ХХ кылымдагы Россиянын эң мыкты баскетболчусу аталган. АКШ, Израиль, Түркия, Италия, Испания клубдарында ойногон. Учурда Москвада жашап, машыктыруучу болуп иштейт.
5. Азия оюндарынын чемпиону Татьяна Ефименко
Кыргыз спортуна эмгек сиңирген чебер, Азия оюндарынын чемпиону Татьяна Ефименко 1981-жылы 2-январда Бишкек шаарында туулган. Ал 2002-жылы Түштүк Кореянын Пусан шаарында өткөн 14-Азия оюндарында бийиктикке секирүүдө биринчи орунду ээлеп, Кыргызстанга алгачкы алтын байгеси тартууланган. 2004-жылы Афина, 2008-жылы Пекин олимпиадалык оюндарына катышкан. 2006-жылы Катардын Доха шаарындагы 15-Азия оюндарында күмүш медаль уткан. Азиянын 4 жолку чемпиону аталган. Эл аралык Гран-при турнирлеринде бир нече ирет жеңишке жеткен. Азия биринчилигинде күмүш, коло медалдарды бир нече ирет уткан. Анын жеке рекорду – 2 метр. Дохадагы жабык имараттагы Азия чемпионатында баш байгени ээлеген. "Даңк" медалы менен сыйланган.
6. Азия оюндарынын чемпиону Татьяна Борисова
Кыргызстанды дүйнөгө, Азияга тааныткан жөө күлүк Татьяна Борисова 1976-жылы Бишкекте туулган. Ал КРдин спортуна эмгек сиңирген чебер, Эл аралык спорт чебери, өлкөгө эмгек сиңирген машыктыруучу. 2002-жылы Пусан шаарында өткөн 14-Азия оюндарында 1500 метр аралыктагы жарышта марага экинчи келип, күмүш медаль тагынан. Бирок Азия оюндарынын чемпиону болгон индиялык спортчу айымдын кызымта, допинг колдонгону аныкталып, Таняга бир жылдан кийин Азия оюндарынын чемпиону катары алтын медаль тапшырылган. Ал — Эл аралык турнирлердин, Азия чемпионатынын эки жолку чемпиону. АКШдагы Остин марафонунун жеңүүчүcү. 2004-жылы Афина олимпиадасына катышкан. КРдин көп жолку чемпиону жана рекордчусу. "Даңк" медалы менен сыйланган. Учурда ата жолун жолдоп машыктыруучу болуп иштеп, Азия чемпионаттарынын жеңүүчүлөрүн тарбиялап жатат. Устаты жана насаатчысы — атасы, Кыргызстанга эмгек сиңирген машыктыруучу Виктор Борисов.
7. Азия оюндарынын коло байге ээси Яна Панова
Балбан айым Яна Панова Кыргызстандын желегин далай ирет желбиретти. Ал 1980-жылы 28-ноябрда Каракол шаарында туулган. Эркин күрөш, бел кур күрөшү, самбо боюнча Эл аралык спорт чебери, кыз-келиндер арасында эркин күрөштөн Азия чемпионаттарынын бир нече жолку коло байге ээси. 2002-жылы Пусан шаарында өткөн 14-Азия оюндарында 3-орунду камсыз кылып, коло байге уткан. Яна КРдин эмгек сиңирген машыктыруучусу, кыз-келиндер арасында эркин күрөш боюнча КРдин эмгек сиңирген спорт чебери. Бел кур күрөшү боюнча дүйнө, Азия чемпионаттарынын жеңүүчүсү болгон. Дзюдо күрөшү боюнча КРдин спорт чебери. 2007-жылдан бери кыз-келиндер арасында бел кур күрөшү боюнча КРдин тандалма командасынын улук устаты. 2003-жылдан бери КТУнун "Политехник" спорт клубунда окутуучу-машыктыруучу болуп иштейт.
