БИШКЕК, 12-мар. – Sputnik. Түнкүсүн эки жол кырсыгы катталып, андан эки жөө жүргүнчү көз жумду. Бул тууралуу Бишкек шаардык ички иштер башкы башкармалыгынын маалымат кызматы билдирди.
Болжол менен саат 00.20 чамасында Mersedes 211 үлгүсүндөгү унаанын ээси Жибек-Жолу проспектисиндег Батыш автобекетине жакын жерде жөө жүргүнчүнү сүзүп кеткен. Айдоочу 800 метрге чейин токтобой унаасын айдаган. Кырсыкка күбө болгон дагы бир айдоочу аны кууп жетип, токтоткону менен кармап кала алган эмес. Адамды сүзгөн айдоочу унаасын таштап, качып кеткен. Учурда милиция кызматкерлери издөө иштерин жүргүзүп жатат. Ал эми жабырлануучу оор абалда ооруканага жеткирилип, ал жактан жан берген.
Андан сырткары 06.50 чамасында №42 автобустун айдоочусу жүргүнчүлөрдү ташып баратып, Дэн Сяопин менен Месарош көчөлөрүнүн кесилишинде жөө жүргүнчүнү сүзүп кеткен. Жыйынтыгында жабырлануучу каза болгон.
Жол кырсыгына шектүү жарандын унаасы айып короосуна токтотулду. Топтолгон материалдар Бишкек шаардык ички иштер башкармалыгынын Тергөө башкармалыгына өткөрүлүп берилди.
Жол кайгуул кызматы жарандарды жолду кесип өтүүдө сак болууга чакырат.
