Майып кызды коюп кеткен айдоочу: итти сүздүм го деп ойлогом

Жазылуу
5-мартта эртең менен Ош базарынын аймагынан майыптардын коляскасы менен жолдон өтүп бараткан кызды машина коюп кеткен. Айдоочу окуя болгон жерден качып, бирок, номери түшүп калгандыктан кайта келген.

Ишемби күнү эртең менен саат 6.30дар чамасында Кулуев көчөсүнөн майып кызды машина коюп кетип, ал окуя болгон жерде каза болгонун Бишкек ШИИБдин Жол кайгуул кызматынын издөө бөлүмүнүн башчысы Ажыбек Майназаров билдирди.

Toyota Chaser үлгүсүндөгү автоунаанын айдоочусу кырсык болгон жерден качып кеткен, бирок, бир сааттан кийин Жол кайгуул кызматынын кызматкерлери тарабынан кармалган.

"Мен кырсык болгон жерге машинанын номерин алуу үчүн келгем. Мени ошол жактан кармашты. Мен итти же мышыкты коюп кеттим го деп ойлогом. Караңгы болчу", — дейт кармалган 26 жаштагы киши. 

Шаардык Жол кайгуул кызматынын издөө бөлүмүнүн башчысы Майназаровдун айтымында, 23-25 жаштагы кыздын буту жок болгондуктан дөңгөлөктүү тактайдын үстүнө отуруп алып кыймылдап жүргөн.

"Машина аны сүзгөндөн кийин тебелеп да каткен. Кыз окуя болгон жерден каза болгон", — деди Майназаров.

Учурда каза болгон кыздын ким экени такталууда. 

Майназаров ошондой эле, кармалган жаран буга чейин Кылмыш жаза кодексинин аткезчилик, адамдын ден соолугуна атайылап залал келтирүү жана уурулук беренелери боюнча айыпталган. Бирок, бир дагы берене боюнча жоопко тартылбаганын Жол кайгуул кызматынын издөө бөлүмүнүн башчысы белгиледи.

Жаңылыктар түрмөгү
0
Алгач жаңыларыАлгач эскилери
loader