БИШКЕК, 2-мар. — Sputnik. Ош облусунун Кара-Суу районунда автожолдорго шагыл төшөөдө аткарылган жумуштун көлөмүн жогорулатуу фактысы боюнча кылмыш иши козголгонун УКМК билдирди.
Маалыматка ылайык, 2015-жылы "Алакан Строй" жана "Вега Строй" ишканалары Эркин жана Коңурат айылдарынын ортосундагы жолдорго, ошондой эле Кара-Суу районунун Сарай айыл аймагынын Присавай айылында шагыл төшөө иштерин жүргүзгөн.
Аудитордук текшерүү учурунда бул уюмдар аткарган жумушунун көлөмүн 1,7 миллион сомго жасалма жогорулатканы аныкталган. Мындан улам мамлекетке ири көлөмдө зыян келтирилген.
Бул факты боюнча Коррупцияга каршы кызматынын материалдарынын негизинде Кылмыш жаза кодексинин негизинде ишенип берилген мүлктү ыйгарып алуу, КРнын кызыкчылыктарына каршы контракт түзүү, документтерди, мамлекеттик сыйлыктарды, штамптарды, мөөрлөрдү колго жасоо беренелерине ылайык кылмыш иши козголду.
Азыркы маалда тергөө иштери жүрүп жатат.
