БИШКЕК, 2-мар. — Sputnik. Чаткал районундагы алтын кенинде иштеген "Фонта" ишканасы 203 килограмм алтынды жашырып койгон фактысы аныкталганын УКМК билдирди.
Маалыматка ылайык, алтын казуу иштери "Сулу-Тегерек" жана "Куру-Тегерек" кендеринде жүргүзүлүп, ишкана өз отчетунда тоо кени 1317,4 миң чарчы метрди түзөрүн белгилеген.
Эскерте кетсек, Улуттук банк бир грамм кыргыз алтынын 1-мартка карата 4446,5 сом чегинде бекиткен. Мындан улам "Фонта" ишканасы 905 миллион сомдук зыян келтирген.
Бул факт боюнча Коррупцияга каршы кызматынын материалдарынын негизинде Финансы полициясы Кылмыш жаза кодексинин 221-беренесине ("Коммерциялык же башка уюмдардын кызматчыларынын ыйгарым укуктарын кыянаттык менен пайдаланышы") ылайык кылмыш ишин козгоду.
Учурда тергөө амалдары жүрүп жатат.
