БИШКЕК, 27-фев. — Sputnik. Британиянын депутаты Дэмиан Коллинз шаршемби күнү ФИФАнын президенттигине экс-талапкер шейх Салман бин Ибрагим аль-Халифти паракорчулук жана коррупция менен айыптады. Ал Кыргызстандын футбол федерациясына каржылык жактан жардам берем деп аны колдоосун суранган деп жазат The Guardian.
Депутаттын айтканы боюнча шейх Салман Азия Футбол конфедерациясынын башчысы болуп шайланганга үч күн калганда 2013-жылдын майында Кыргызстандын футбол боюнча федерациясынын өкүлдөрү менен жолуккан. "КР футбол федерациясы шейх Салмандын "жакын досу" башкарган Азиянын олимпиадалык кеңешинен 53 долбоорду ишке ашыруу үчүн финансылык жардам сурашкан",— дейт британ депутаты.
Анын айтымында, Кыргызстандын футбол федерациясы Азиянын Олимпиадалык кеңешинен финансылык жардам сурай албайт. Аталган кеңеш ФИФАнын эмес, эл аралык олимпиада комитетинин мүчөсү.
"Аталган абалдан улам, КРдин Футбол федерациясы Азиянын Олимпиадалык кеңешинен финансылык жардам алуу менен өз добушун шейх Салманга беребиз деп сөз беришкен деп айтууга толук негиз бар", — дейт Коллинз.
КРдин футбол федерациясынын президенти Семетей Султанов британ парламентинин депутатынын айткандары "сасык саясат" экенин Sputnik Кыргызстан маалымат агенттигине билдирди.
"Айткандарынын бирөө да чындыкка дал келбейт. Мунун баары шайлоо үчүн ойлоп табылган нерселер", — дейт Султанов.
Шейх Салмандын маалымат катчысы да британ парламентинин айткандарын четке какты.
Ал ортодо Цюрих (Швейцария) шаарында ФИФАнын жаңы президенти болуп УЕФАнын башкы катчысы Жанни Инфантино шайланды.
Инфантино экинчи турда добуштардын жарымынан көбүн алып, ФИФАнын тарыхында тогузунчу президент болуп калды. ФИФАнын шайлоого катышкан 207 мүчөсүнүн 115и өз добушун Инфантиного беришкен.
Анын негизги атаандашы шейх Салман бин Ибрагим аль-Халифа —88 добуш алган.
