БИШКЕК, 25-фев. — Sputnik. Стамбул шаарынын прокуратурасы "Галатасарай" футбол клубунун мурдагы оюнчусу Хакан Шүкүрдү бир жылдан төрт жылга чейин камакка алууну талап кылууда. Мындай аракеттер футболчунун Twitter баракчасына президент Режеп Тайип Эрдоганга акарат келтирген билдирүүсүнөн улам болуп жатканын Sabah гезити маалымдайт.
2011-жылы июнда Шүкүр Түркиянын бийликтеги партиясы "Адилеттүүлүк жана өнүгүүдөн" депутат болуп шайланып, 2013-жылы өзүнүн ыйгарым укуктарын тапшырган.
Ошондой эле, Anadolu маалымат агенттигинин билдиришинче, Эрдоганга акаарат келтирген деп альпинист Насух Махрук да айыпталууда. Анын "Эрдоган эмнеге президент болбошу керек" деген макаласы үчүн тергөө иштери жүрүп жатат.
Буга чейин Түркиянын бир катар жарандарына анын ичинде журналисттерге карата Эрдоганга акаарат келтиришкен деп бир канча кылмыш иши ачылган. Түркиянын мыйзамына ылайык, президентти шылдыңдагандарга акчалай айып салынат же абакка кесилет.
Хакан Шүкүр Түркиянын кубогун "Галатасарай" клубу менен бир нече жолу уткан. Ошондой эле УЕФАнын кубогун (азыр Европа Лигасы) жана УЕФАнын супер кубогун жеңишкен. Түркиянын курама командасында 112 оюн өткөрүп, 51 гол киргизген. Бул көрсөткүч улуттук команданын оюнчуларынын ичинде рекорд болуп саналат. Андан сырткары командасы менен 2002-жылы Дүйнөлүк чемпионатта үчүнчү орунду камсыз кылган.
