БИШКЕК, 22-фев. — Sputnik. Россия Кыргызстандын энерго секторунда өнөктөштүк менен иш алып барууга кызыкдар. Бул туурасында РФтин Мамлекеттик Думасынын депутаты "Справедливая Россия" фракциясынын лидеринин орун басары Алексей Чепа КСДП парламенттик фракциясынын лидери Чыныбай Турсунбеков менен жолукканда айтты.
Алар энергосектор, айыл чарба багытында кызматташуу боюнча пикир алмашты.
"Россия Кыргызстандын энерго секторунда өнөктөш иш алып барууга кызыкдар, бул боюнча инвесторлор табылат. Биз сиздердин өлкөдө чакан ГЭСтерди курууга мүмкүнчүлүктөр көп деп билебиз", — деди Чепа.
Мамдума депутаты россиялык ишканалар кыргыз жеринде өстүрүлгөн мөмө-жемиштерди импорттоого жана аны кайра иштетүүгө ынтызар экендигин кошумчалады.
