БИШКЕК, 9-фев. – Sputnik. Бишкек — Ош унаа жолунун 155-чакырымында мунай ташыган унаа оодарылып кеткендиги тууралуу Өзгөчө кырдаалдар министрлигинин маалымат кызматы билдирди.
"Бүгүн саат 14.00 чамасында "Кыргыз Нефть" ишканасына караштуу мунай ташуучу унаанын айдоочусу рулду башкара албай жолдон чыгып оодарылып кеткен", — деп айтылат маалыматта.
Мунай төгүлгөн эмес жана жабыркагандар жок. Оодарылган унааны "Кыргыз Нефть" ишканасынын жумушчулары крандын жардамы менен тургузуп, алып кетишери маалыматта белгиленет.
Эске салсак, 5-февралда Бишкек — Ош жолунун 500-чакырымында Honda Accord үлгүсүндөгү жеңил машина DAF маркасындагы май ташуучу унаа менен кагышып кеткен. Натыйжада 38 тонна май ташып келе жаткан унаа толугу менен күйүп, бактыга жараша айдоочу аман калган. Ал эми жеңил унаанын ичиндеги үч жүргүнчү ар кыл жарааттарды алышкан.
