БИШКЕК, 6-фев. — Sputnik. Тизмеге Кызыл китепке кирбеген жаныбарлар да алынды. Асыл тукумдуу жандыктарды кармоого бардык жарандар акылуу. Болгону, башка өлкөдөн алынып келген болсо, чек арадан тиешелүү документтери текшерүүгө алынат.
Интернетте сатууга жарыяланган эң кымбат жаныбарлар:
Жорго. Боюу 175 сантиметр болгон беш жаштагы жоргого 17 миң доллар суралат. Бул "Lexsus GX 470" үлгүсүндөгү унаанын баасына барабар;
Марал. Кызыл китепке кирип баалуу жандыктардын катарын толуктаган маралды дагы сатып алса болот. Жарнаманын ээси жандыкка болгону 1,5 миң доллар сураган. Анын бир музоосу 500 доллар экени да көрсөтүлгөн. Мыйзам боюнча маралга аңчылык кылууга тыюу салынган. Аны атып алган кишиге 400 миң сом айып тагылат.
Төө куш. Африкалык төө куштун баасы маралдан 5,5 миң долларга кымбат болуп чыкты. Он жаштагы төө кушту ээси жети миң долларга баалайт. Куштардын арасынан эң чоң деп эсептелген төө куштун салмагы 156 килогарммга чейин жетет, ал эми жумурткасы Бишкекте эки миң сомдон беш миң сомго чейин бааланат;
Хатико. Японияда ишенимдин, берилгендиктин жана туруктуулуктун символу атыккан Акита-Ину тукумундагы күчүктүн баасы 1000 доллар деп көрсөтүлгөн. Так ушул тукумдагы Хатико аттуу ит ээсине берилгендиги менен Япониянын тарыхында калган. Ага атайын эстелик да тургузулган;
Бишон фризе күчүгү. Кичинекей көлөмдүү франциялык бишон фризе тукумундагы күчүктөрүнө 950 доллар суралат. Бул жүнү аппак, узундугу 15-30 сантиметр келген асыл тукумдуу жаныбар;
Аляскалык маламут. Аляскалык маламут ити эң байыркы тукумдардын түрүнө кирет. Мындан улам 2010-жылдан тарта Аляска штатынын символу катары кабыл алынган. Аталган тукумдагы күчүктүн баасы 700 доллар деп көрсөтүлгөн;
Мейн-Кун мышыгы. Мейн-Кун тукумундагы мышык дүйнөдөгү эң чоң мышык болуп саналат. Анын салмагы 5,5 килограммдан 10 килограммга чейин жетет. Бул мышык үчүн анын ээси 700 доллардан жогору бааларды койгон;
Короз. Мыкты мушташкан короздордун баасы дагы арзан эмес. Эң төмөн дегенде 300 доллардан башталат. Мушташка машыктырылган тооктор дагы бар, алардын баасы да 300 доллардан жогору;
Кескелдирик. Түндүк Американы байырлаган Игуана түркүмүндөгү кескелдирикти Кыргызстандан табууга болот. Анын баасы 450 доллар деп көрсөтүлгөн;
Кыргоол. Кооз канаттуулардын бири кыргоолго болгон баа беш миң сомду түзөт. Сатып алгысы келген адамдар интернетке "кыргоол" деген сөздү терсе эле бардык дайын-дареги менен чыга келет.
