БИШКЕК, 5-фев. — Sputnik. Апрель революциясын шылдыңдап жаткан айрым куудулдар менен кошо Бек Борбиевге да чара көрүү керек деген депутаттын сөзүнө ырчы жооп кайтарды.
2 Үчтүн айы 2016, 12:55
Бейшемби күнү парламанеттин жыйынында депутат Мээрбек Мискенбаев куудулдар өз тамашалары менен апрель революциясынын баатырларына сөз тийгизип жатканын айтып, Бек Борбиевдин Минскиге барып Бакиевге ырдаганын сындаган. Бул үчүн эл өкүлү ырчынын "Эмгек сиңирген артист" наамынан ажыратуу керектигин билдирген.
Депутатка болгон жообун Борбиев Facebook социалдык тармагындагы өздүк баракчасына жарыялады.
"Бакиевдин тоюна барып ырдап келгеним, кайталайм, ал менин жеке жумушум. Эгер ал адам биздин бийликке душман, кылмышкер болсо кармап келип, жоопко тарткыла! Мен барган жерге силер бара албайсыңарбы?!", — деди ырчы.
Кыргызстандын эмгек сиңирген артисти Бек Борбиев өз жообунда аны чыккынчы деп атагандар өздөрү эмне иш кылып кыйратканына кызыккан.
Бек Борбиевге чейин депутаттын айткан сынына куудулдар да үн катып жооп беришкен.
