БИШКЕК, 1-фев. — Sputnik. Февралдын ортосунан баштап мамлекеттик ипотекалык насыя бериле баштай турганын Sputnik Кыргызстан агенттигине "Мамлекеттик ипотекалык компания" ишканасы билдирди.
Процессти баштоо үчүн өкмөттүн токтому керек. Ал насыя алчуларды тандап алуунун критерийлерин белгилеп, турак-жайдын стандарттарын аныктайт. Токтомдук долбоорун коомчулук бир айдын тегерегинде талкуулайт.
"11-февраль күнү бир айлык мөөнөт аягына чыгат, 12-13-февраль күндөрү токтом кабыл алынат деп турабыз. Азыр тизме даярдалып жатат. Тандоо процесси жүрүүдө. Демек, февралдын ортосу менен насыя бериле баштайт", — деп айтылат билдирүүдө.
Мамлекеттик компания "Жеткиликтүү турак жай" программасын ишке ашыруу үчүн түзүлгөн. Мында насыянын максималдуу көлөмү 3 миллион сомдун чегинде болуп, алгачкы төлөм турак жайдын жалпы баасынын 10дон 30 пайызына чейинки сумманы түзөт. Үстөктүн көлөмү 12-14 пайыздын чегинде болот. Ипотеканы үч жылдан бери иштеген дарыгерлер, мугалимдер жана социалдык кызматкерлер ала алышат.
