Ысык-Көл облусунун Түп районундагы Кең-Суу айылынын 12 жигити көк бөрү оюнуна кызыгып, өзүлөрүнүн "Кең-Суу" командасын түптөшкөн. Жигиттер күнүнө бир маал чогулушуп, ат үстүндө оюнга катышып жаткандай машыгышуу жүргүзүшөт.
Команданын капитаны Улан Бектенов улакка түшүү үчүн балдар атайын даярдыктар өтөрүн айтат.
"Балдар улакка сырттан келе калып эле түшпөйт. Ал үчүн атайын даярдыктан өтүп, бул жерден машыгабыз. Аттын макетин жасап койгонбуз. Ага минишип гираларды көтөрүп, ыргытып машыгышат. Улакка түшүү үчүн күчүн жана чеберчилигин арттырышат", — дейт ал.
Оюнчулардын бири Замир Исаев кыш мезгилинде дагы ат таптоо иши токтобой турганын айтты. Эң башкысы аттардын асты кургак болушу керектигин, жылкыларга бала баккандай эле кам көрүлөт дейт ал.
Команда 2016-жылы Ысык-Кол облусунда өтүүчү Дүйнөлүк көчмөндөр оюнуна дагы катышууга белсенишүүдө.
