БИШКЕК, 31-авг. — Sputnik. "Ак-Кула" ат майданында көк-бөрү боюнча президенттин Кубогу үчүн мелдештин жеңүүчүсү аныкталганын Мамлекеттик дене тарбия жана спорт агенттиги билдирди.
Салтка айланган бул турнир жыл сайын Кыргызстандын Эгемендүүлүк күнүнө арналып өткөрүлөт. Мелдештин финалдык беттешүүсү Бишкекте 31-август күнү өттү.
Баш байгеге былтыркыдай эле Талас шаарынын "Талас" командасы ээ болду. Финалдык беттеште аталган топ Чүйдүн "Сары-Өзөн" командасын 4:1 эсебинде жеңип алды. Үчүнчү орун үчүн "Достук" жана "ИИМ" командалары ат салышып, 11:2 эсеби менен "Достуктун" көкбөрүчүлөрү жеңип кетти.
Биринчиликке татыган "Талас" командасы бир миллион сом алды. "Сары-Өзөнгө" 500 миң сом берилди. Үчүнчү орунду ээлеген "Достук" командасына 250 миң сом, ал эми "ИИМ" командасына 100 миң сом ыйгарылды.
