БИШКЕК, 4-янв. – Sputnik. "Ислам мамлекети" террордук уюму беш кишини "британиялык тыңчылар" деп жазалап жаткан видеожазууну Улуу Британиянын өкмөт башчысы Дэвид Кэмеронго эскертүү иретинде жарыялады. Бул туурасында The Independent маалымдады.
Видеожазууга Улуу Британиянын пайдасына тыңчылык кылды делген саргыч кийимчен беш киши түшүрүлгөн. Басылма бул адамдар британиялыктар болбосо да, коалицияга иштеп, Ракка шаарынан согушкерлер жөнүндө фото жана видеоматериалдарды чет элдик чалгындоо кызматтарына берип турушкандыгын жазды.
Жазалоо алдында бет капчан согушкерлердин бири видео "Дэвид Кэмеронго багышталарын" айтып, британдык премьерди "көк мээ" жана "Ак Үйдүн кулу" деп атаган деп жазды The Independent.
Бул топ мезгил-мезгили менен массалык жазалоону (христиандарга, журналисттерге, чет элдиктерге, аскер адамдарына) жүргүзүп, аны видеого тартып, интернетке жайгаштырып турат. Буга чейин NBC жана CNN телеканалдары "Ислам мамлекети" террордук уюму саргыч кийимчен кишини жазалап жаткандыгын көрсөткөн. Видеодогу маалыматтарда, жаза алдында ал маалыматтарды ФСБге берип тургандыгын айткан.
2015-жылдын январында "Ислам мамлекетинин" айтымында, россиялык атайын кызматтар менен иштешкен эки кишини өлүм жазасына тартышкан. Видеону текшерүүгө алган эксперттер чын, төгүндүгүн аныктай албай коюшкандыгын айтышкан.
