БИШКЕК, 25-дек. — Sputnik. Ирактын атайын кызматтары масташбдуу рейддин алкагында "Ислам мамлекети" террористтик тобунун 40 мүчөсүн кармады. Бул туурасында Франс Пресс маалымат агенттиги билдирди.
Бул рейддер Багдад жана Дияла провинцияларында жасалгандыгы кабарланууда.
"Терроризмге каршы жасалган рейддин алкагында кылмыш үчүн пайдаланыла турган жарылуучу бир топ каражаттар, жардыргычтар тагылган жан кечтилерди курлары, аларга тиешелүү автоунаалар, ири суммадагы акча алынды", — деп маалымдады Ирактын күч түзүмдөрүнүн мүчөлөрүнүн айткандарына таянган агенттик.
"Ислам мамлекети" террористтик тобу бүгүнкү күндө дүйнөнүн башкы коркунучтарынын бири болуп калууда.Үч жыл ичинде террористтер Ирак менен Сириянын көпчүлүк жерлерин басып алышкан. Алар эми өз таасирин Түндүк Африкада, тагыраак айтканда, Ливияда жайылтуу аракетин көрүп жатат. Террорчулар басып алган жерлердин жалпы аянты 90 миң чарчы чакырымга жетет. Экстремисттик топтун катарындагылардын саны ар кандай маалыматтар боюнча 50 миңден 200 миңге жетет.
