БИШКЕК, 12-дек. — Sputnik. Соцтармактарда белгилүү болгон Нурайым бүгүн милицияга өзү келгенин Бишкек ШИИБ билдирди.
Буга чейин бир катар ЖМК жана соцтармактарда бейтааныш кыздын кымбат баалуу унаалардын жанынан түшкөн сүрөтү жарыяланган. Машиналарга NURAIYM деген номер тагылган. Сүрөттөрдө кыз өзүнүн өңүн таанылгыс кылып койгон. Мындай номерди пайдалануу мыйзамсыз деп табылган.
Бир аз убакыттан кийин Нурайымдын социалдык тармактагы баракчасында аталган номерди Бириккен Араб Эмирлигиндеги унаага тагып жаткан сүрөт жайгаштырылып, анын чөлдөгү автожарышка катышары айтылган.
Милициянын маалыматы боюнча 19 жаштагы кыз шаардык ЖОЖдун биринде окуйт. Ал эми бир топ чуу жараткан номер кадимки картондон жасалганы белгилүү болду.
Укук коргоо органдарынын өкүлдөрү Нурайымдын өзүнүн сөздөрүн айтып беришти. Ал маалымат каражаттары аны калкалап турган адам тууралуу туура эмес түшүнүп алышканын айткан.
"Кыздын өзүнүн аты Нурайым болуп чыкты. Ал анын аракети коомчулукту мынчалык дүрбөлөңгө саларын ойлобогонун айтууда", — дейт милиционерлер.
Чуулгандуу Нурайым унаасы да, айдоочулук күбөлүгү да жок экенин, бирок бал чагынан баштап машиналарга кызыгып келгенин айткан. Ал чындап эле кымбат баалуу унаалардын ээлерине кайрылып, сүрөткө түшүп алуу өтүнүчү менен кайрылып келген.
Милиция Нурайымдын чындап эле Дубайга барганын тастыктады.
"Ал Дубайга эс алганы же качып кетүү үчүн эмес, туугандарыныкына барган. Эч кандай көңүлдөшү, керек болсо жигити да жок экенин айткан", — деп айтылат билдирүүдө.
Укук коргоо органдарынын өкүлдөрү Нурайымга административдик да, кылмыш жоопкерчилигине да тартылбай турганын белгилешти, анткени жасалма номер менен көчөлөрдө жүргөн эмес.
