Соцтармактарда талкууланган Нур-Айым менен байланышы бар айдоочулар кармалды

БИШКЕК, 7-дек. — Sputnik. NURAIYM аттуу жасалма мамлекеттик номер тагылган унаалардын айдоочулары кармалганын Жол кайгуул кызматы билдирди.

Буга чейин бир катар ЖМК жана соцтармактарда бейтааныш кыздын кымбат баалуу унаалардын жанынан түшкөн сүрөтү жарыяланган. Машиналарга аталган номер тагылган. Кыздын өзү божомолдор боюнча Жогорку Кеңештин имаратында иштейт, анткени, Instagram баракчасына жарыяланган сүрөттөрдүн көбү ошол жактан тартылганы анык болгон. Мында кыз өзүнүн өңүн таанылгыс кылып койгон.

Жол кайгуул кызматынын маалыматы боюнча кармалган машиналар учурда унаа токтотуучу жайга киргизилген. Ээлерине административдик айып пул чегерилди.

Унаа ээлери сүрөттөрү жайгаштырган кыз менен тааныштыгы жок экенин айтышкан. Кыз алардын унаа салонуна келип, кымбат баалуу автолордун фонунда сүрөткө түшүп алууну суранып, андан кийин белгисиз тарапка кетип калчу.

ЖКК кызматкерлери жасалма номер тагылган башка унааларды аныктоо боюнча аракеттерди көрүп жатат.

Мындай номерлүү унаа айдоо мыйзам бузуу катары саналып, 3 миң сомдон 5 миң сомго чейинки административдик айып пул каралган. Бул учурда унаа айып короого токтотулуп, номерлер жоготулат.

Мамлекеттик каттоо кызматы буга чейин VIVAT, VIP, BIRBOL, BOSS, MMM жана LIDER сыяктуу энчилүү аттар жазылган алты номер сатылганын маалымдаган. Алар расмий сатылып алынгандыктан пайдаланууга уруксат берилген. Калган мыйзамсыз номерлерди аныктоо Жол кайгуул кызматынын милдети болуп саналат.

Машиналардын жаңы номери кандай боло турганын Sputnik инфографикасында көрө аласыз>>