БИШКЕК, 8-дек. — Sputnik. Премьер-министр Темир Сариев өкмөттүн жыйынында турак-жай курууда анын сапатына өзгөчө көңүл бурууга чакырды.
Өкмөт башчы кечээ, 7-декабрь күнү Кыргызстанда эки жолу жер титиреп, андан Ош жана Нарын облустарындагы имараттардан жарака кеткенин белгилеп, өкмөттүн Нарын облусундагы ыйгарым укуктуу өкүлү Аманбай Кайыпов жер титирөө күчү сезилген аймакка жөнөтүлгөнүн маалымдады.
Жыйын жүрүшүндө Сариев жарандарга кайрылып, турак-жай курууда курулуштун сапатына жана коопсуздугуна өзгөчө көңүл бурууга чакырды.
"Биздин жарандар турак жай курууда эң башкы көңүлдү анын коопсуздугуна жана сапатына бурушу керек. Ар бир жаран сак болсо, ар кыл кыйроолордун алдын алууга болот", — деди премьер-министр.
ӨКМ жер титирөөдөн үй, бала бакса жана мектеп имараттарынан жарака кетип, жабыркаган мал-жан катталбаганын билдирген.
