БИШКЕК, 2-дек. — Sputnik. Кылмышкерлердин колунан каза тапкан участкалык милиционер Актилек Абдувалиевдин атасы Асан Исабаев Оштон келип, уулу менен чогуу кызмат өтөгөн кесиптештерине жолукту. Бул тууралуу Бишкек шаардык милициядан билдиришти.
Абдувалиевдин карамагындагы №8 кичи райондун тургундары кайгылуу окуяга кайдыгер калбай чогултуп берген 22 миң сом өлчөмүндөгү каражатты тапшырды.
Исабаев уулунунун өмүрүн алгандар кармалат деген үмүтүн билдирди.
"Уулумдун өлүмүнө забын болгондор кармалып, мыйзам чегинде жоопко тартылышын каалайм. Менин тилегеним эле ушу", — деди милиционердин атасы.
Милициянын кенже лейтенанты Актилек Абдувалиев 19-ноябрь күнү саат 19.55те 8-кичи райондогу №38 үйдүн жанынан эки кылмышкердин колунан каза тапкан. Маалыматка ылайык, аталган аймактын 26 жаштагы тескөөчүсү үй ууруларын кармоо учурунда өлтүрүлгөн.
